Mas ku 1200 hende muhé a selebrá Dia Internashonal di Hende Muhé

Mas ku 1200 hende muhé a selebrá Dia Internashonal di Hende Muhé den un anochi titulá “Un muhé yená ku Spiritu Santu”

Willemstad 11-03-2019- Djabièrnè último, dia Internashonal di Hende Muhé, mas ku 1200 hende muhé a bini huntu pa disfrutá di un anochi spesial organisá pa Iglesia House of Worship entitulá “Un muhé yená ku Spiritu Santu”. Pa mas ku 10 aña Iglesia House of Worship ta presentá un anochi spesial dediká na kada hende muhé den nos sosiedat pa bendishoná i enkurashá e hende muhénan pa ta muhénan diferente i balente den nan hogar i den nos komunidat. E aña aki no tabata un eksepshon. E gran kantidat di hende muhé i tambe hende hòmber ku a presensiá e anochi aki por a disfrutá di alabansa, baile, poesia i un drama konmovedor ku a yega te na kurason di kada hende muhé.

E anochi aki a kulminá ku un mensahe poderoso tresé pa Pastora Arlette Juliet. E énfasis di e mensahe tabata “Kon lo bo ke wòrdu kòrdá?”. Bo ta wòrdu kòrdá pa loke ta dirigí bo bida. I si bo pèrmití E Spiritu Santu di Dios dirigí bo bida lo bo ta diferente. Bo no tin e nesesidat pa bringa den bo mes forsa pero lo bo sa di entregá na Dios i dependé kompletamente di djE. Asina lo bo eksperensiá kambio den bo situashon.

Hopi hende muhé a wòrdu toká i bendishoná di un manera spesial i Dios a hasi milagernan grandi di sanashon riba e anochi aki. Siguramente e hende muhénan a sali enkurashá i fortalesé for di e anochi aki ku tabata kompletamente yen. Riba e kombinashon di potrèt por mira un resúmen di loke a akontesé riba e anochi aki. For di awor nos ke ekstendé un invitashon spesial na kada hende muhé pa tei presente otro aña dia 8 di mart na iglesia House of Worship pa huntu nos selebrá i wòrdu fortalesé pa E Palabra di Dios.