Manda bo mensahe ku nos formulario di kontakto



    Kuantu sirbishi boso tin?
    Sirbishinan di Iglesia House of Worship:

    Djadumingu 9 AM – 11:30 AM: Sirbishi di Selebrashon
    Djamars 7:30PM – 9:00 PM: Estudio Bíbliko
    Djabièrnè 7:00 PM – 9:00 PM: Hubentut
    Tur dia 5:45 AM – 6:30 AM: Orashon
    Tur dia 1:00 PM – 1:45 PM: Orashon (Manda bo orashon di 1 minüt na 511-5342)
    Unda boso ta situá?
    Iglesia House of Worship ta situá na Erosweg 52, Jongbloed.
    Kon mi ta kore yega?
    Iglesia House of Worship ta situá na Erosweg #52. Si bo bin di Jongbloedweg bo mester bai na bo man robes ora bo yega na e T-kruising ku ta subi riba Erosweg. Ora bo sigui kore bo ta topa ku Iglesia House of Worship na bo man drechi. Si bo bin di Cas Coraweg, bo ta pasa Radulphus College na man robes bayendo direkshon di Sta. Rosa. Pasa Flamingoweg i subi Erosweg na man drechi.
    Kon mi ta hasi pa duna un ofrenda?
    Pa bo duna un ofrenda bo por hasi esaki durante di oranan di sirbishi. Tambe bo por depositá esaki riba e number di kuenta di iglesia House of Worship: BDC 14343602, bou di nòmber House of Worship kaminda den e deskripshon bo ta spesifiká ku ta un ofrenda.
    Mi ke pa boso hasi orashon pa mi. Kon esaki ta bai?
    Si bo tin mester di orashon pa algu, tin e posibilidat pa bin dilanti na e altar despues di e sirbishi. Semper tin rumannan pará kla pa tuma tempu i hasi orashon pa bo.
    Mi ke entregá mi yu na Señor. Kon esei ta bai?
    Si bo ke entregá bo yu na Señor bo por aserká Rainer i Mirugia Pieternelle i nan lo duna bo un fecha pa esaki. Tambe bo por yama nos na nos number di telefòn: 738-4344 pa haña un fecha pa esaki. Durante sirbishi Pastor Raimy i Arlette lo yama abo i bo famia pa asina huntu komo iglesia nos presentá i entregá bo yu dilanti di Dios Todopoderoso.
    Kon mi ta hasi bestèl un cd di predikashi?
    Pa bo bestèl un cd di predikashi bo por yama 738-4344 òf bo por pasa despues di sirbishi den boekenwinkel i hasi bo pedido
    Mi ke batisá. Kon esei ta bai?
    Boutismo ta un desishon hopi serio ku bo ta tuma pa dera bo bida bieu i nase di nobo. Si abo ke tuma e desishon tremendo aki bo por aserká diakuno Ronald Ignecia despues di sirbishi òf bo por yama nos tambe na nos number di telefòn: 738-4344 pa risibí e fecha di boutismo. E boutismo ta sosodé tur luna riba djadumingu na final di sirbishi.
    Mi ke kasa na House of Worship. Kon mi por regla esaki?
    Si abo ke tuma e desishon serio di uni bo mes den matrimonio ku e persona speshal den bo bida i bo ke pa esaki sosodé na iglesia House of Worship bo mester pasa den e proseso di konsegeria matrimonial. Pa haña un sita pa esaki bo por aserká Beverly Mathilda ku lo tra un afsprak pa abo i bo futuro esposo/a sinta ku Pastor Raimy i Arlette pa papia tokante esaki.
    Tin posibilidat pa mi haña un sita ku pastornan?
    Si bo ta deseá pa tra un afsprak ku Pastor Raimy Juliet bo por aserká Beverly Mathilda ku lo duna bo un fecha pa bo afsprak. Si bo ta deseá pa tra un afsprak ku Pastor Arlette Juliet bo por aserká Alice Juliet ku lo duna bo un fecha pa esaki. Si akaso bo no ta kongregá na iglesia House of Worship tin e posibilidat pa bin riba djadumingu despues di sirbishi dilanti na e altar. Semper tin rumannan pará kla pa hasi orashon pa bo.
    Kiko ta e e-mail adrès di boso iglesia na Hulanda?
    E email adres di House of Worship Hulanda ta: houseofworshiphulanda@gmail.com
    Kon largu e sirbishi di djadumingu ta dura?
    Sirbishi di djadumingu ta di 9AM pa 11AM. Nos ta kuminsá e sirbishi ku alabansa i adorashon, kontinuá pa e mensahe ku Dios a duna e siervo di Dios. Na final semper tin un orashon saserdotal ku Pastornan ta hasi pa henter e pueblo.
    Tin e posibilidat pa mi haña tradukshon durante e sirbishi?
    Tur djadumingu tin e posibilidat pa risibí tradukshon di Papiamentu pa Hulandes, Papiamentu pa Ingles i tambe Papiamentu pa Spañó. Si bo tin mester di tradukshon indiká esaki na un Usher.