DJADUMINGU SIRBISHI 9:00 A.M / DJAMARS ESTUDIO BIBLIKO 7:30 P.M. / DJABIERNE HUBENTUT 7:00 P.M.
Ban gana Korsou pa Kristu

Iglesia riba Wil

Iglesia riba wil

House of Worship

Estudio bíbliko den bario

Nos ta kere ku tur kristian ta yamá pa hiba E Bon Notisia. Esaki ta un mandato ku nos a haña di Hesus kaminda El a bisa nos: “Pesei, bai i hasi tur e nashonnan disipel di Mi, i batisá nan den nòmber di e Tata i di e Yu i di e Spiritu Santu, i siña nan pa kumpli ku tur loke mi a ordená boso; i mira, Mi ta ku boso semper, te na fin di mundu. Amèn.” (Mateo 28:19-20). Komo iglesia nos ta kere ku e kongregashon no por keda será meimei di kuater muraya. E iglesia mester sali i hiba E Bon Notisia pa tur esnan rondó di dje. “Kon anto nan lo invoká Esun, den Kende nan no a kere? I kon nan lo kere den Esun, di Kende nan no a tende? I kon nan lo tende sin un predikadó? I kon nan lo prediká si nan no wòrdu mandá? Manera ta pará skirbí: “Ki bunita ta e pianan di esnan ku ta prediká e evangelio di pas, esnan ku ta trese notisianan alegre di kosnan bon!” (Romanonan 10:14-15)
icon_

Evangelisashon

Evangelisashon den barionan
Nos pais tin mester di Dios i e hendenan mester tende ku tin speransa pa nan i nan famia. Nos no mester solamente konta E Evangelio, pero nos mester tuma tempu tambe pa disipulá i siña e hendenan tokante e kaminda di salbashon. Pa e motibu akí Iglesia House of Worship tin e mishon ‘Iglesia riba wil’. E mishon akí a kuminsá na 2015 i lo sigui te ora ku nos pais ta kompletamente saturá ku E Palabra di Dios. Nos sa ku Dios ta bai hasi kosnan maravioso i ekselente riba nos pais; ta p’esei nos lo sigui hiba E Bon Notisia rònt Kòrsou.
 
 

Kiko ta E Evangelio?
E Palabra di Dios ta siña nos pa bai prediká E Evangelio.

E palabra evangelio ta bini for di e palabra griego ‘evangelion’ ku ta nifiká bon notisia. Ta pa konta Dios Su grandesa na esnan ku no konos’E. Den Marko kapítulo 16 versíkulo 15, Hesus a bisa Su disípulonan: "... Bai den henter mundu i prediká e evangelio na tur kriatura.” Esaki ta un mandato i no un opshon. P’esei ta wòrdu bisá ku pa hiba E Evangelio ta pa kumpli ku e gran komishon, e gran mandato. Hesus a duna nos e ehèmpel di esaki, ora ku El a lesa i kumpli ku loke ta pará skirbí den e buki di Isaias 61:1 (Lukas 4:18-19).

 E Spiritu di Señor DIOS ta riba mi, pasobra SEÑOR a ungi mi pa hiba bon nobo (evangelio):

Na esnan afligí.
El a manda mi pa kura hende di kurason kibrá.
Proklamá libertat na katibunan.
Libertat na prezunan.
Proklamá e aña agradabel di SEÑOR.

 
Kerido lesadó

Plan di Salbashon

Nos ta kumindá bo den e nòmber di nos Señor Hesukristu.
Awe nos tin un bon notisia pa kompartí ku bo.
E Palabra di Dios ta mustra nos ku Dios ta stima kada un di nos masha hopi mes. Pa e motibu akí El a manda Su úniko Yu Hesus, pa ken ku kere den djE no bai pèrdí, ma haña bida eterno. E no a manda Hesus pa kondená nos, pero pa nos por wòrdu salba. Ta esaki ta e plan perfekto di Dios pa e salbashon di humanidat. Dios sa ku ningun hende no por salba nan mes; ta p’esei mes El a manda Su Yu Hesus.
Nos tur a peka i a falta ku e gloria di Dios, pero Hesus Su sanger a wòrdu dramá na e krus di Kalvario pa pordon di nos pikánan. P’esei E Palabra di Dios ta bisa ku na tur esnan ku risibiÉ, na nan E ta duna derechi pa bira yunan di Dios.
Awe Dios ke pa bo bira Su yu i loke ku bo tin ku hasi ta masha simpel, pero profundo.
Den e buki di Romanonan 10:9-10, nos por lesa: “ku si bo konfesá ku bo boka Jesus komo Señor, i kere den bo kurason ku Dios a lant’E for di e mortonan, lo bo ta salbá; pasobra ku kurason hende ta kere pa haña hustisia, i ku boka e ta konfesá pa haña salbashon. Pasobra Skritura ta bisa: “Ken ku kere den djE lo no keda brongosá.’’ Awe ta bo dia di salbashon; awe ta bo dia di bisa ‘SI’ na Señor. No keda mas kaminda bo ta, pero habri bo kurason pa Hesus bin habitá den dje. Si bo ke tuma e desishon akí awe, ripití e orashon akí:
 

“Señor Hesus, awe mi ta gradisí Bo pa un dia nobo.
Pordoná mi tur mi piká i fayonan.
Mi ta rekonosé ku Bo a muri pa mi pikánan.
Bin biba den mi kurason, Señor Hesus, i duna mi un bida nobo.
Mi ta pidi Bo esaki, Dios, den nòmber di nos Señor Hesus. Amen.”