Mas ku 1200 hende muhé a selebrá Dia Internashonal di Hende Muhé
March 12, 2019
Youth Experience a selebrá su di 15 aniversario ku un tremendo
LIVE TV SHOW
Willemstad 24-02-2019 Djabièrnè último, e programa di televishon Youth Experience Hubentut i Fe, ku ta pasa tur djasabra 4’or di atardi na planta nashonal TeleCuraçao, a selebrá 15 aña di eksistensia. Youth Experience ta un programa di hóben ku ta enfoká pa kompartí e palabra di Dios di hóben pa hóben i tambe eduká i informá hóbennan den diferente aria ku sekshonnan variá i interesante manera “Huki di eksperensia”, “DIY”, “Kabei i makiyage”, “1 minute vlog”, “School Bible Quiz” i hopi mas.
Pa selebrashon di su 15 aniversario e hóbennan di Youth Experience a organisá un tremendo Live TV show kaminda tur ku tabata presente por a eksperensiá bibu kon produkshon di e programa aki ta bai. Esaki ta algu úniko na Kòrsou i a konta ku asistensia total di 1200 mucha, hóben i adulto. Tur presente por a disfrutá di e sekshonnan ku a keda presentá bibu i tambe un tremendo School Bible Quiz den kua New Song College a titulá kampion.
Banda di esaki tabatin baile presentá pa e skol di baile How-to-Dance, Muchanan Balente College i Nathan Senchi direktamente for di Boneiru a deleitá e hóbennan ku su mas resiente produkshon “Bendishon”. Durante e programa a tuma e oportunidat pa honra tur esnan ku di un òf otro forma a kontribuí na 15 aña di produkshon di e programa aki.
E selebrashon a konkluí ku un mensahe bendishoná tresé pa Pastor Chesron Richardson di iglesia House of Worship Hulanda ku sigur a inspirá spesialmente e mucha i hóbennan pa uza nan talentonan pa honra Dios i sirbi’E, ku ta e motibu pa kual nos a wòrdu kreá. Na final di e anochi aki un kantidat grandi di hóben a tuma e desishon tambe pa sigui Hesus i esaki siguramente tabata e “highlight” di e anochi. Riba e kombinashon di potrèt por apresiá un resúmen di e Live TV Show.
E tim kompleto di Youth Experience ker a gradisí henter e pueblo di Kòrsou pa 15 aña di sintonia i sosten na nos hóbennan. Nos tim di hóben lo sigui traha duru pa trese programanan na nivel haltu i ku mensahenan bíbliko i positivo pa asina duna un aporte na desaroyo di nos hóbennan. Kòrda sintonisá e programa aki tur djasabra 4’or na bo planta nashonal TeleCuraçao, “like” nos página di Facebook i spera mas di bo programa Youth Experience Hubentut i Fe. •