Kurso “Leadership Skills” organisá pa Desert University tabata un èksito rotundo
November 1, 2019
Prinsipionan di Viktoria
April 1, 2020
Willemstad – Djadumingu 8 di mart último, dia Internashonal di Hende Muhé, alrededor di 1500 hende muhé a bini huntu pa disfrutá di un anochi spesial organisá pa Iglesia House of Worship entitulá “Un Muhé Enamorá”.
Anualmente e anochi aki ta keda organisá spesialmente pa tur dama aki na Kòrsou, kaminda tur aña tin un palabra di enkurashamentu kombiná ku ministrashon di baile, kanto, testimonio i otro presentashonnan spesial dediká na e ser muhé. E aña aki e anochi aki tabata grandi i bunita atrobe kaminda un gran kantidat di hende muhé i tambe hende hòmber a asistí. E alabansa i adorashon, baile i testimonionan presentá a krea un atmósfera kaminda bo por a sinti e presensia di E Dios di amor.
Pastora Arlette Juliet a trese un mensahe na e okashon aki ku tur muhé por a relatá kuné. “Un muhé enamorá ta duna tur kos pa su enamorado, e ke pasa tur momentu kuné i ta dediká na dje. E ke pa tur hende konosé i e tin plaser den pasa tempu huntu kuné. Manera un muhé enamorá nos mester skohe pa enamorá kada dia mas di Dios. Dios no ta warda pa nos ta bon pa e por stima nos. Su amor ta asina grandi pa nos ku Su amor ta alkansá nos unda ku nos ta i den kua kondishon ku nos ta. Pèrdè bo mes den Su amor, laga E sana bo kurason i transformá bo den un muhé kompletamente enamorá di DjE”, ta algun palabra ku Pastora Arlette a kompartí.
Na final di e anochi Pastornan Juliet a hasi orashon pa tur esnan ku tabatin nesesidat di esaki i tabatin un momentu hopi bunita kaminda e multitut a adorá Dios den un solo bos. Esei tabata algu impreshonante pa eksperensiá kon un kantidat grandi di hende muhé ta bini i adorá Dios huntu. Siguramente e damanan a sali enamorá i enkurashá for di e anochi aki. Riba e kombinashon di potrèt por mira un resúmen di loke a akontesé djadumingu último.•
