Tur kos ta kontra bo?

Tin un diferensia hopi grandi entre alabá Dios i ofresé un sakrifisio di alabansa.

Kiko bo ta hasi ora bo haña bo den un kondishon ku tur kos ta kontra bo,

ku nada no ta na bo fabor?

Alabansa ta un reakshon natural for di algu ku ta benefisiá bo direktamente.

Bo ta alabá Dios pa loke El a hasi pa bo.

Alabansa ta bin outomátikamente ora algu bon pasa ku bo.

Ora algu bon pasa bo niun hende no tin ku pidi bo pa alabá Dios.

Pero sakrifisio di alabansa ta ora bo ta skohe pa alabá Dios ora kos no ta bai bon.

Ora banko bèl bo ku un mal notisia, dòkter duna bo un resultado ku bo no a spera, bo pèrdè trabou…

Bo ta dispuesto na alabá Dios tòg den e momentunan ei?

Sakrifisio di alabansa ta ora bo rekonosé ku ta Dios i solamente E ta bo solushon, E ta Esun ku ta duna bo un salida.

Hopi biaha alabansa no ta nos promé reakshon ora kos ta bai nos malu. Nos promé reakshon hopi biaha ta yora i lamentá.

Pero ora bo ta pasa den momentu difísil hende mester sa ku bo ta gradisido na Dios no opstante bo situashon.

No kulpa Dios pa nada ku bo pasa aden. Konsiderá tur kos komo parti di un proseso.

Asta algu ku a frakasá por wòrdu uzá pa algu bon.

Asta algu ku a bai malu Dios por bir’é i lag’é obra pa bon!

Beibel ta bisa: “Mi no a bisa bo si bo kere lo bo mira e Gloria di Dios?” (Huan 11:40)

Nos tin 2 tipo di wowo, wowo natural i wowo spiritual.

Bo por mira e intenshon di Dios Su kurason ku bo wowo spiritual so.

Esaki ta pone bo duna alabansa adelantá.

Ora abo haña bo den un momentu ku tur kos ta kontra bo, ku nada no ta na bo fabor, kiko bo ta hasi?

Kua ta e akshonnan konkreto ku bo ta tuma ora abo pasa den un situashon difísil?

Bartimeo e hòmber siegu, sin por mira, a rekonosé Hesus komo Rei. Esei a hala Hesus su atenshon mésora. Un hòmber rechasá i bandoná, Hesus a skuch’é!

Tabatin míles di hende rondó di Hesus. Pero tòg Hesus a skucha Bartimeo su sakrifisio di alabansa. Su sakrifisio di alabansa a dun’é su sanashon.

No ta eksistí bo ofresé un sakrifisio di alabansa sin haña un kontesta di Dios.

Nunka Dios a keda sin respondé ora un hende hasi un sakrifisio di alabansa.

Tin algu ta bai sosodé, tin algu ku tin ku bin na bo fabor, ora bo duna gloria na Dios promé.         

Bo ta bai haña bo bendishon pèrsonal.

Dios a krea un momentu di sakrifisio di alabansa, na BO benifisio.

Dios ta bai hasi algu ku bo mes forsa no por hasi, ora bo duna Dios e fruta di bo lepnan,

bo sakrifisio di alabansa!