Prinsipionan di Viktoria

Prinsipionan di Viktoria.

Den bida nos por haña nos ku preokupashon, atake, situashonnan fèrfelu òf prueba ta presentá pero nos mester pèrkurá pa e úniko preokupashon ku nos tin ta pa stima Dios, pa hasi Su boluntat.

P’esei semper nos mester ta prepará ku e hèrmèntnan nesesario pa nos sa kon pa batayá i keda kana den viktoria ku Kristu Hesus.

Viktoria riba miedu

Ora nos tende un mal notisia, komo hende, nos por haña miedu. Pero pa e hende hustu mal notisia ta un oportunidat pa hala mas serka di Dios.

Ora miedu bin riba nos no ta ora di kore bai for di Dios, ta ora di kore bai serka Dios. Rekonosé ku Dios ta mas grandi ku nos i mas grandi ku nos problema. Nos no mester mira Dios igual ku nos problema. Dios ta mas grandi i E tin e poder pa libra nos i yuda nos.

Nos mester ta manera Rei Josafat ku a disidí di buska Dios (2 kro 20:3). Su miedu no a kit’é for di Dios. Su miedu a hal’é mas serka di Dios. Pero esaki ta pasobra Josafat a kustumá di buska Dios den tur kos. El a siña di reakshoná korekto riba tur situashon.  El a tuma esaki over for di su antepasadonan.

Lès: Nos mester trein nos mente pa mira miedu komo un oportunidat pa buska Dios i drenta den un komunion mas íntimo ku Dios.

Viktoria riba atake

Ora un atake bin riba nos bida, nos mester bai bèk na e promesanan di Dios pa nos bida. Nos mester rekòrdá kiko Dios a hasi pa nos den pasado i bisa: “E mésun Dios ku a libra mi for di e situashon aki, e mésun Dios ku a yuda mi den e situashon ei ta e mésun Dios ku lo libra mi awe!” Pasobra Dios ta E mésun Dios ayera, awe i den tur eternidat. Heb. 13:8

Ki ora ku e enemigu ataká nos, nos mester bai bèk serka Señor. Si nos tin ku skonde mes, laga pa nan haña nos skondé den Kristu, den Dios.

E enemigu su tarea ta pa laga nos lubidá e promesanan di Dios pa nos bida. Unabes e logra pa nos lubidá e promesanan di Dios, nos no ta bai mira un salida for di nos situashon, i esei e enemigu ke, pa nos pensa ku esei ta e final.

Nos mester hasi manera Rei Josafat. El a rekonosé Dios. El a bisa Señor un t’Abo a trese mi te aki. Mi konfiansa ta den Bo. (2 Kro 20: 6-9)

Tin biaha bo no sa kiko pa hasi, bo no sa di unda e atake ta bin. Pero nos mester ta kapas pa bisa, Dios mi no sa kiko pa hasi pero mi speransa ta den Bo palabra (Salmo 119:81). Nos no sa kiko pa hasi pero nos wowo ta riba Bo. (2 Kro 20:12)

Lès: Nos mester hasi’é un hábito di rekòrdá e promesanan di Dios den nos bida. Nos mester keda kòrda nos mes kiko Dios a hasi pa nos den pasado i hopi importante, konta otro kontinuamente kiko Dios a hasi pa nos. P’esei ta importante pa nos evangelisá. Ora nos evangelisá outomátikamente nos ta konta nos testimonio i nos ta papia ku e hende di e promesanan di Dios, asina nos mes tambe ta keda rekòrdá e promesanan pa nos mes bida.

Viktoria dor di konfiansa den Dios

Ora nos ta den bataya, tin dia no ta dia di prepará nada. Tin dia ta dia di para mira Dios trese salbashon! Den e bataya nos tin ku stashoná nos mes i para mira e salbashon di Dios. E echo ku nos ta stashoná nos mes ta nifiká ku nos ta fuerte pará, nos sa ken nos ta den Dios i mas prinsipal nos sa ken Dios ta pa nos. (2 Kro 20:17)

Hopi importante ta pa nos kita sikiera 10% di nos dianan liber pa nos por buska Dios. Pasobra nos ta den bataya kontinuamente i esaki ta rekerí ku nos tin ku pone nos kosnan di hasi un banda, apartá pa puntra Dios pa direkshon pa nos bida.

Lès: Pa nos tin e pas nesesario den un momentu di bataya pa por ta apto pa no bringa i djis stashoná nos mes i para mira e salbashon di Dios nos mester tin sufisiente konfiansa den Dios. E konfiansa ku nos a “build up” den Dios ta hasi ku nos por para ketu i mira Dios su salbashon. Pasobra nos ta konfia den Esun ku ta kapas pa trese salbashon. Pero nos no por traha riba konfiansa den Dios sin tuma tempu ku Dios.

Manera nos ta duna diesmo di nos entradanan asina nos tin ku duna diesmo di nos tempu tambe pa buska Dios.  E tempu ku nos ta pasa den Dios Su presensia ta fortalesé nos pa loke nos tin ku enfrentá.

Viktoria dor di alabansa na Dios

Tin bataya ta fuerte, nos no sa di unda e ta bin òf kon pa kontra aresté. Ora e enemigu lanta kontra nos bida tin biaha nos tin ku kanta pa nos mira viktoria. Alabansa ta un arma poderoso ku ta kapas pa trese liberashon. Manera Rei Josafat a hasi, el a pone alabansa dilanti i dor di esaki Dios a prepará atakenan di sorpresa kontra su enemigunan. (2 Kro 20: 22)

Lès:  Nos mester tin komo hábito diario pa pone alabansa dilanti! Esei kemèn ku nos mester kuminsá nos dia ku alabansa. Purba den situashonnan nobo ku presentá pa apliká “kanta bo bataya” en bes di “bringa bo bataya”. Pasobra segun bo ta kanta bo bataya, bo ta mas dependiente di Dios ku ora bo ta bringa bo bataya. Hopi biaha bo ta kuminsá bringa ku Dios despues bo ta mira ku eigenlijk ta riba bo mes forsa bo ta bringando.

Pero ora bo ta someté bo mes kompletamente na Dios i skohe pa kanta, bo ta mustra un konfiansa asina haltu na Dios ku e ta bira un adorashon na Dios. E kondishon di bo kurason den e bataya ta toka Dios Su kurason i esaki ta pone ku Dios ta duna bo e viktoria.

 

E Prinsipionan di Viktoria:

• Laga tur kos ku pasa bo hiba bo serka Dios. Laga Dios ta bo fuente prinsipal.

Atversidat ta un oportunidat pa hala mas serka Dios. Ora Dios ta bo Fuente prinsipal outomátikamente tur kos ta guia bo bèk serka Dios.

 

• Laga ku bo kas ta buska yudansa serka Dios na promé lugá.

Nos yunan mester lanta mira ku nos promé reakshon ta pa buska Señor.

 

• Ora problema bin riba bo, bai bèk na e promesanan di Dios.

Lag’é ta un hábito di buska Dios den tur momentu, prinsipalmente den momentu di problema.

 

• Rekonosé ku Dios ta mas grandi ku bo enemigunan.

Nos mester trein nos bista spiritual pa mira Dios manera E ta: E Dios Todopoderoso. Ya asina ora e enemigu ataká nos, nos por tin e abilidat pa kompará nos problema ku Dios i mira Dios manera E ta enrealidat, esta, mas grandi ku nos enemigunan.

 

• Kòrda Dios riba Su hazañanan.

Mester ta nos hábito pa meditá riba unda Dios a hiba nos i kuantu kos El a hasi pa nos. Mester keda konta i rekòrdá nan pa ora e enemigu bin nos mente ya ta di trein pa bai bèk na e promesanan di Dios.

 

• Trese henter bo famia dilanti di Dios.

Esaki no mester ta ora di atake so sino tur dia.

 

• Stashoná bo mes, no bai skonde. Para i mira e salbashon di Dios. Sea un hende stabil.

Komo Kristian nos no tin e espasio pa ta hendenan hopi emoshonal pasobra e no ta yuda nos pa ta stabil spiritualmente. Si nos reakshonnan semper ta sali for di nos emoshon nos no por ta hendenan stabil, pero si nos reakshonnan ta guiá pa e Spiritu Santu di Dios, asta den un momentu di krísis nos por ta den kòntròl.

 

• Despues ku bo risibí un palabra, baha kabes i rekonosé ku Dios ta mas haltu ku bo. Nos tin ku pone nos korona abou. Rekonosé di unda tur kos ta bini.

E versíkulo aki nos a haña ku ta pas ku e prinsipio aki: “O SEÑOR, Abo ta duna nos pas, pasobra tur loke nos a logra te awor t’Abo a hasi pa nos.” Isaias 26:12

• Hòmbernan lanta halsa e nòmber di Dios.

E hòmber ta e kabes di kas, un símbulo di outoridat. Si e hòmber ta konektá ku Dios, henter e kas ta wòrdu yená i e desishonnan pa e hogar tambe ta wòrdu guiá pa e Spiritu Santu di Dios.

• Despues di bo viktoria bai bèk serka Dios, i yama Dios danki.

Gratitut mester ta pa viktorianan nobo i pa viktorianan bieu. Dor di yama danki bo ta rekonosé ku no ta abo a hasi nada pero ta Dios a hasi’é pa bo.

Un prinsipio tambe ta pa yama Dios danki adelantá. Rei Josafat i su ehersito a duna danki na Señor promé ku nan a mira e viktoria. (2 Kro 20: 21)