“Proskuneo Legacy” ta riba merkado
June 4, 2019
Kurso “Leadership Skills” organisá pa Desert University tabata un èksito rotundo
November 1, 2019
Willemstad – Wikènt último iglesia House of Worship a organisá un konferensia grátis di dos dia spesialmente pa hóbennan entre 11 pa 25 aña kaminda tur e hóbennan por a siña mas di nan propósito den Dios i tambe partisipá na diferente workshop.
Ya pa hopi aña kaba Iglesia House of Worship ta organisá “Hóben Balente” en konekshon ku selebrashon di dia Internashonal di Hóben ku nochinan di alabansa i mensahe pa enkurashá hóbennan pa nan ta hóbennan balente. E aña aki e vishon tabata pa laga e hóbennan sa mas di e propósito ku Dios tin pa nan bida i pa impartá abilidatnan prátiko den e hóbennan. E hóbennan por a skohe entre diferente workshop for di karpinteria te makiyahe, entrepreneurship te direktor musikal, arte di fèrf te fotografia. Den e 20 opshonnan di workshop ku e hóbennan tabatin tur hóben por a haña algu ku nan gusta.
Riba e promé dia di e konferensia agrupashon T.R.U.E i Jefferey Tromp a ministrá i Pastor Raimy Juliet a kompartí un mensahe di su testimonio personal ku e hóbennan. Riba e di dos dia di e konferensia agrupashon Sound of Heaven a ministrá i tabata dia ku e diferente workshopnan a tuma lugá. E mensahe prinsipal di e konferensia tabata pa no laga “social media” tuma kòntròl di bo bida, disidí di lanta i konektá ku bo futuro. Bo por tin soñonan grandi pero dor di dal stapnan chikí tiki tiki bo ta kana drenta den bo propósito.
Na final di e konferensia tabata un gran satisfakshon di mira kon kontentu e hóbennan tabata ku loke nan a risibí i kuantu abilidat práktiko nan a siña. Nos ta konfia ku e hóbennan aki lo alkansá lo máksimo di nan kapasidat i ku Dios lo kumpli ku Su propósito den nan bida. Den e relato fotográfiko por haña un impreshon di e konferensia. Den futuro nos lo sigui organisá tipo di konferensianan aki pa enkurashá hóbennan pa ta balente i ehemplar den nos komunidat.
